विजयधन: बिग फुट संग्रहालयाची अविस्मरणीय सफर...

बिग फुट संग्रहालयाची अविस्मरणीय सफर...

१८ मे हा दिवस जागतिक संग्रहालय दिवस म्हणून १९७७ सालापासून जगभरात मोठ्या उत्साहात साजरा केला जातो. दरवर्षी आंतरराष्ट्रीय संग्रहालय कौन्सिल मार्फत जगभरात विविध कार्यक्रमाचे आयोजन केले जाते. गेल्या अनेक वर्षांपासून जगभरातील देशांचा हा या कार्यक्रमात मोठ्या प्रमाणात सहभाग दिसून येत असतो. या कार्यक्रमात अनेक ऐतिहासिक तसेच विचित्र गोष्टींचे सुद्धा प्रदर्शन पाहायला मिळते. भारतात सुद्धा अनेक संग्रहालय आहेत, परंतु त्यातील काही संग्रहालयांची आपल्याला माहिती सुद्धा नसते असेच एक संग्रहालय गोव्यातील मडगाव जवळच्या लोटोली गावात आहे. या बिग फूट संग्रहालयाला संग्रहालय दिनीच भेट देण्याचा योग जुळून आला.

जुन्या काळातील गोमंतकीय जीवनशैली अर्थात गोव्यातील हिंदू-ख्रिश्चन धर्मियांच्या शेकडो वर्षाच्या सहचारातून निर्माण झालेली इथली ग्रामीण,सामाजिक जीवनशैली दाखवणारे अख्खे गावच पुतळ्याच्या माध्यमातून बिग फूट संग्रहालयात उभे करण्यात आले आहे.गोमांतक भूमीतील खेड्यातील जीवनाचे दर्शन घडवणारी ही लघु घरे आणि दुकाने असलेले 'मॉडेल व्हिलेज' हे देखील पाहण्यासारखे आहे.संग्रहालय फिरताना पर्यटकांना इंग्रजी,हिंदी आणि कोंकणी भाषेत संग्रहालयातील माहिती देण्यासाठी दृकश्राव्य माध्यमाचा कल्पकतेने उपयोग करण्यात आला आहे.संग्रहालय रोजगार व पर्यटनवृद्धी कसे करू शकते याचे बिग फूट संग्रहालय उत्तम उदाहरण आहे.येथील व्यवस्थापनही उत्तम असल्याने ठिकठिकाणी स्वच्छता आढळते.

सर्जनशील मनाच्या कलाकारांनी कल्पकतेने उभारलेल्या बिग फूट संग्रहालयामागील कथा रोचक अद्भूत असून स्वार्थी,व स्वतः पुरत्याच आभासी जगात वावरण्या-या आजच्या माणसाला सकारात्मकता व मानवता धर्माची ओळख करून देते. संग्रहालयाच्या मध्यभागी श्रद्धावान पर्यटकांसाटी बिगफुट मंदिराची उभारणी करण्यात आली असून गाभाऱ्यात जाऊन बिगफूटचे दर्शन घेण्याआधी तयार करण्यात आलेल्या सभामंडपात स्क्रीनवर बिगफूट (मोठे पाय) मागील कथा पर्यटकांना दाखविण्यात येते. याची सुंदर मांडणी थक्क करणारी आहे.संत मीराबाईचे १४ मीटर लांबीचे शिल्प या संग्रहालयाचे संस्थापक महेंद्र अल्वारिस यांनी ३० दिवसांत कोरले आहे. कोकणापासून गोव्यापर्यंत मोठ्या प्रमाणात हजारो वर्षापूर्वीच्या मानवाने कातळावर कोरलेली कातळशिल्पे आज पर्यटकांना आकर्षिक करित आहेत.त्याप्रमाणेच अल्वारिस यांनी सुद्धा संत मीराबाईचे हे शिल्प जांभ्या दगडात (लॅट्राईट) कोरले आहे.हे भव्य शिल्प पाहून कातळशिल्पांची आठवण आल्याशिवाय रहात नाही.बिग फूट संग्रहालयाचे हे मुख्य आकर्षण असून भारतातील सर्वात लांब लॅटराइट शिल्प म्हणून या शिल्पाने लिम्का बुक ऑफ रेकॉर्डमध्ये आपले स्थान निर्माण केले आहे.

संत मीराबाईचे जांभ्या दगडातील शिल्प.

येथील हस्तकला केंद्रावर विविध प्रकारच्या गोव्यातील कलाकृती पर्यटकांसाठी उपलब्ध आहेत ज्या आपल्या घराला सुशोभित करु शकतात तसेच गोव्याच्या या अविस्मरणीय सफरीची आठवण म्हणून तुमच्या स्मृती सदैव ताज्या ठेवतील.अभ्यागतांचे मनोरंजन करण्यासाठी येथे बिग फूट डान्स फ्लोर, बिग फूट रेस्टॉरंट, क्रॉस आणि बरेच काही आहे. सोबतच बोका दा वाका नावाचा झरा, पक्ष्यांचे निवासस्थान, मसाल्यांचे आवार, रबर वृक्षारोपण इत्यादींसह ते निसर्गाचा मोहक स्पर्श देते. हे मानवी आत्म्याला ज्ञात असलेल्या सर्व सुखांचे परिपूर्ण मिश्रण सादर करते. हे तुम्हाला निसर्गरम्य सौंदर्याचा आनंददायी स्पर्श तसेच नृत्य आणि पार्टी करण्याचा उत्साह देते.

आपल्या स्वर्गीयसुंदर गोमांतकीय भूमीतील समृद्ध वारसा व संस्कृती संग्रहालयाच्या माध्यमातून उभी करून सा-या जगला अभिमानाने दाखवावी व आपला हा वारसा कटाक्षाने जपून ठेवण्याची तीव्र इच्छा यातून सर्जनशील मनाच्या अल्वारिस यांनी मोठ्या जिद्दीने हे भव्य संग्रहालय उभे केले. गोव्याच्या ग्रामीण जीवनाची झलक दाखविणारे हे संग्रहालय पणजीपासून सुमारे २५ किमी अंतरावर तर मडगांवपासून ०६ किमी अंतरावर आहे.खाजगीरित्या चालविले जाणा-या या संग्रहालयाला सकाळी ९ ते संध्याकाळी ६ या वेळेत आठवडाभरात भेट देता येईल. प्रवेश शुल्क म्हणून किमान १०० रु. शुल्क देखील इथे आकारले जाते.या संग्रहालयाचे प्रवर्तक महेंद्र अल्वारीस यांनी जांभा दगडात बनवलेले देशातील सर्वात मोठे आणि सर्वात जलद बनवलेले संत मीराबाईचे शिल्प,आशियातील एकमेव असे डावखु-यांचे संग्रहालय, गोमांतकीय निसर्ग जीवन,ग्रामीण सामाजिक संस्कृती सर्वच पाहण्यासारखं आहे.एकूणच पैसा वसूल असलेले बिग फूट संग्रहालय पाहणे आनंददायी अनुभव असून दक्षिण गोव्यात आलेल्या पर्यटकांनी इथले सुंदर समुद्रकिनारे, मंदिराना भेट देताना लोटौलिम गावातील बिग फूट संग्रहालयालाही आवर्जून भेट द्यायला हवी तरच खऱ्या अर्थाने गोमांतकीय समृद्ध जीवनशैलीचा अनुभव घेता येईल.

🖼️🖼️🖼️🖼️

विजय हटकर.

लांजा