भाटे खाडीतील बॅकवाॅटर्स सफारी

     भाटे खाडीतील बॅकवाॅटर्स सफारी

      बॅकवाॅटर्स सफारी म्हटलं की डोळ्यासमोर उभी राहते ती  देवभूमी केरळ व तिथले सुंदर खाडीकिनारे.तिथल्या बॅकवाॅटर्स सफारीचा आनंद घेण्यासाठी केरळात मोठ्या संख्येने पर्यटक गर्दी करित असतात.आता मात्र कोकणातही ठिकठिकाणी बॅकवाॅटर्स सफरी टुरीझम बहरत असून रत्नागिरीला भेट देणाऱ्या पर्यटकांना भाट्ये खाडीत बॅकवाॅटर्स सफारीचा आनंद आता घेता येणार आहे.

          मँगो सिटी रत्नागिरी जवळच्या तोणदे गावातील प्रयोगशील कलाकार संदीप पावसकर यांनी तोणदे गावातून जाणाऱ्या भाट्याच्या खाडित (काजळी नदी)  बॅकवाॅटर्स सफारीचा आनंद देण्यासाठी पारंपारिक बोटीला कल्पकतेने सजवित भाटे खाडीत पर्यटन वृद्धींगत करण्याच्या दृष्टीने  एक सकारात्मक पाऊल टाकले आहे. काल कुटुंबियांसह तोणदे गावातील धक्क्यावरून संदीप पावसकरांच्या सोबतीने भाटे खाडीतील बॅकवाॅटर्स सफारीचा आनंद घेतला.भाटे खाडीतील विहंगम नजारा पाहताना  कोकणाला स्वर्ग का म्हणतात हे याचे देही याचे डोळा अनुभवले. रत्नागिरीतील गायक गुरुदत्त नांदगांवकर ही यावेळी सोबत असल्याने ही सफर सांगतिक आनंदाची अनुभूती देणारी ठरली.

     

 सह्याद्री डोंगर रांगेत आंबा घाटाजवळ केव नदीचा उगम होतो.तर विशाळगडाच्या पायथ्याशी उगम पावून गड नदी किरबेट,भोवडे,भडकंबा या गावातून प्रवाह करत थेट कोंडगावात केव नदीला मिळते.केव नदी व गड नदी यांचा संगम झाल्यावर या नदीलाच पुढे काजळी नदी या नावाने ओळखले जाते.काजळी नदी पश्चिम वाहिनी असून  रत्‍नागिरीजवळ  भाट्ये या गावाजवळ ती अरबी समुद्राला जाऊन मिळते व तेथे भाट्याची खाडी तयार होते.मँगो सिटी म्हणून प्रसिद्ध असलेल्या कोकणातील स्वर्गीय सुंदर रत्नागिरी जवळच्या भाट्ये गावात काजळी नदी सिंधूसागराला मिळते.म्हणून या नदीला भाटे व लगतच्या गावात भाट्याची खाडी असे संबोधतात.या खाडीलगत वसलेली सोमेश्र्वर ,तोणदे ही निसर्गरम्य गावे कोकणचे सौंंदर्य अधोरेखित करतात. सोमेश्र्वर पंचक्रोशीतील तोणदे गावातील संदीप पावसकर या अवलियाने हिरवा निसर्ग सोबतीला असणाऱ्या या खाडीत दोन बोटी कल्पकतेने एकत्रित करित (याला आमच्या कोकणात जुगाड म्हणतात)पर्यटकांना खाडीतुन फिरविण्यासाठी एक उत्तम पारंपारिक फेरिबोट तयार केली आहे.त्याच्या या प्रयोगाला गावातील मित्रांनी, पर्यटन क्षेत्रातील जाणकारांनी प्रोत्साहन दिल्याने आज संदीप पावसकर व्यवसायिक दृष्टिकोनातून फेरीबोटीतून पर्यटकांना भाटे खाडीतील सफारीचा आनंद देतात.या खाडीतून फिरताना निसर्गाचे संगीत ऎकताना आपण स्वतःलाच हरवून जातो.

      

          भाट्ये बॅकवाटर्सचा आनंद घेणारे पर्यटक

        तसेच भाटे खाडीक्षेत्रामध्ये कर्ला येथून सोमेश्र्वर, चिंचखरीपर्यंत बॅकवाॅटर्स टुरीझमला प्रोत्साहन देण्यासाठी राज घाडीगांवकर,प्रशांत परब व सचिन देसाई यांनी एकत्रित येऊन डाॅल्फिन बोटिंग क्लब सुरु केले आहे.नारळ पोफळीच्या सुंदर बागा,खारफुटीची वने व छोटी छोटी बेटे, जुवे व चिंचखरी येथील दत्तमंदिर, शिंपल्यांपासून चुना बनविण्याचा कारखाना यासह अनेकविध पक्षी, किनाऱ्यावरची घरे ,मच्छीमा-यांची किनाऱ्यावरची घरे,जाळे टाकून केली जाणारी मासेमारी ,भरती-आहोटीच्या वेळी खुलून येणारे सौंदर्य आदींची सफर बोटीतून करता येते.भाट्येपासून सोमेश्र्वरपर्यंतच्या बॅकवाॅटर्समध्ये बोटिंग करण्याचा यशस्वी प्रयत्न या गतवर्षी पर्यटन महोत्सवाच्या निमित्ताने केला होता.त्याला पर्यटकांचा उत्तम प्रतिसाद लाभला होता.एकूणच भाटे खाडी मुखाशी कर्ला येथून  बॅकवाॅटर्स सफर घडवुन अाणणारे राज घाडीगांवकर  व मंडळी तर तोणदे येथे संदीप पावसकर यांसारख्या धाडसी तरुण मंडळींमुळे भाट्याची खाडी कोकणातील 'बॅकवाॅटर्स सफारी'चा उत्तम पर्याय म्हणून नावारूपाला येत आहे.

     खरं तर रत्नागिरी पर्यटकांच्या दृष्टिने कोकणातील हाॅट डेस्टिनेशन आहे.बाराही महिने आपली वेगवेगळी रुपं दाखविणारा इथला समृद्ध निसर्ग ही खरी रत्नागिरीची श्रीमंती आहे.ही श्रीमंती अनुभवायला मॅगो सिटी रत्नागिरी वर्षाचे बाराही महीने येवा कोकण आपलाच असा असे सांगत असते जणू! गणपतीपुळे व इथले आपलं कोकण संग्रहालय ,आरे-वारे बीच, जयगड किल्ला व जेटी, पावस येथील स्वामी स्वरुपानंद मंदिर, गणेशगुळ्याचा स्वच्छ सुंदर किनारा व तिथले गणपतीचे मंदिर ,रत्नागिरी शहरातील अष्टदशभूजा गणेश,पतीतपावन मंदिर,लोकमान्य टिळक जन्मस्थान, वीर सावरकरांना ज्या कोठडीत स्थानबध्द करण्यात आले होते ती कोठडी, थिबा पॅलेस, राजमाता जिजाउसाहेब उद्यान, मत्स्यालय ,त्रिमिती तारांगण,पानवलचा रेल्वे पूल व धबधबा, निवळीतील वाॅटरपार्क , मालगुंडच्या किनाऱ्यावरील एरिक पॅरा मोटरिंग,रत्नदूर्ग किल्याजवळील समुद्रातील अद्भुत दुनिया दाखविणारी स्कूबा सफर,,मांडवी व भाट्ये बीच या सोबतच फळांचा राजा हापूस अांब्याची चविष्ट सोबत पर्यटकांना इथे मिळते.संदीप पावसकर व डाॅल्फिन बोट क्लबच्या राज घाडीगांवकरांमुळे या नव्या बॅकवाॅटर्स सफारीने रत्नागिरीतील या पर्यटनस्थळांच्या यादीत कर्ला व तोणदे गावाचाही आता समावेश करावा लागेल.याच गावात एका पर्यटन प्रेमीने हापूस कृषी व ग्रामीण पर्यटन केंद्राची निर्मिती केली आहे.या पर्यटन केंद्रात उत्तम व्यवस्था केली जाते.सोबतीला  कोकणी भोजनाचा आनंदही घेता येतो.रत्नागिरी शहरालगत अशी अनेक कृषी व पर्यटन केंद्रे आज आकारास आली आहेत.तसेच दर्जेदार हाॅटेल्सही उपलब्ध असल्याने मनपसंद पर्याय निवडून आपण इथे निवांत राहू शकतो.

   

        रत्नागिरीत येणा-या पर्यटकांना केरळच्या बॅकवाॅटर्सचा आनंद आता भाटे खाडीतील या बॅकवाटर्स सफारीचा माध्यमातून मिळणार असून हा अविस्मरणीय अनुभव घेण्यासाठी तोणदे गावातील संदीप पावसकरांच्या किंवा कर्ला इथल्या राज घाडीगांवकरांच्या  डाॅल्फिन बोट क्लबच्या फेरीबोटीतून एकदा तरी अवश्य जायलाच हवे! 

    
भाटे बॅकवाॅटर्स सफारीसाठी संपर्क :--

संदीप पावसकर ,तोणदे -9923577239
राज घाडीगांवकर,कर्ला  -9822165165

🛶🛶🛶🛶

विजय हटकर-लांजा

सर्जनशील कलाकार व कोण म्हणतो बेवड्याक मान नाय फेम पावसकर भाटे खाडी सफारीचे निमंत्रण देताना..

डाॅल्फिन बोडिंगमध्ये क्लबच्या राज घाडीगांवकरांसह रम्य सफरीचा आनंद घेताना पर्यटक.

भाटे खाडीत बॅकवाॅटर्स सफारीचा आनंद घेताना  गायक गुरुदत्त नांदगांवकर,दशरथ गोसावी सर ,संदीप पावसकर व अस्मादिक